قصة اختي مع زوجها بعد 6 سنوات زواج
فترة بسيطة ! ومو وايد لكن يشهد الله انها ماشافت منه الا كل ود واحترام و حب
زوجها هذا عاشت معاه حياة رغد وحياة عز و حياة حب و وئام
اللي حتى بعد خيانته لها تحلف وتقول ماشفت منه الا كل الزين !
زوجها كان يدلعها دلع ماصار كانوا كل البنات بعايلتنا يغارون من حظها بالزواج به
كانوا حسادها واااايد و منافساتها واااايد
خصوصا ان اختي فنانة رسامة و مبدعة باللبس والابتكار
كانت كشخه حدها و تلبس وتكشخ ودوم تبهر من حولها بكشختها
واختي جميلة ما شاء الله عليها جمال عربي حقيقي جمال مابه شي صناعي والله العظيم مو عشانها اختي
انا خواتي 5 واعترف بأنها احلانا كلنا واحنا عاديات يعني مو ذاك الجمال اللي تنبهر به العين
المهم تزوجت منه زواج تقليدي واسألوا عنه اخواني سؤال عدل وتقصوا عنه عدل
يعني يمكن شهرين وهم يسألون عنه
وماسمعوا عنه الا كل خير رجال لا يشرب لا يدخن رجال يصلي ويقوم بعباداته على اكمل وجه يعني انسان ملتزم ومتدين نوعا ما وفاتج مجلسه و اللي بجيبه مو له
يعني وااااااااااايد سمعنا عن كرمه بشكل خيالي هو وابوه
المهم وتزوجت به والحمدلله ماشافت منه الا كل خير
يدلعها ويسفرها و رومنسي معاها لابعد الحدود ويتذكر كل التواريخ المهمه بحياتهم واللي مو مهمه
يعني حتى تاريخ رجعتها من بعد النفاس يذكره
كل شي ومهتم فيها اهتمام لو تقول احس بألم بخصرتي او بيدي خذاها ثاني يوم عالمستشفى
يعني حساس معاها لابعد الحدود وهي عمرها ما قصدت المادة بحياتهم يعني الحمدلله
احنا بحياتنا شايفين خير يعني هي ببيتها وببيته نفس المستوى ويحلف عليها ان صرفت شي من راتبها مو احسن لها
وكان يجيب لها الهدايا بصورة خيالية يعني ما يصك شهر الا ويمكن عندها 3 هدايا
وانجبت منه ولد و قال لها ابيج توقفن حمل ابيج تسافرين معاي وتاخذين ماجستير
ووافقت وراحت معاه واقاموا بفرنسا سنتين وخذت الشهادة وجاتنا
وحياتهم حلوة ووايد متفقين
عمره ما منعها من زيارة وكل شي بينهم باتفاق سواء بالعمل بالصرف بالحياة الزوجية والاجتماعية وكل شي
وبعد مارجعت من السفر جاتها بنت خالة امي وخذتها الغرفة وقالت لها يا فلانة ادري ما تحبيني لكن ابي اقولج شي واقسم لج بربي انه حقيقي واني انا لما شفته مارضيت ونسيت كل الزعل اللي بيننا
قالت لها لختي شنو ؟؟؟ قولي ؟
قالت شفت زوجج مع وحدة بفندق مشهور وكبير وهااااديء يوم الجمعة وتحلف انها شافته وهي رايحه تتعشى مع زوجها
اختي ما صدقت وقالت اكيد ذي تبي تخرب خاصة ان بينهم خلاف قديم
وقالت لها كيفج لكن والله اني ماقلت غير الحقيقة صدقتي كان بها ماصدقتي براحتج
واهلمت اختي الموضوع ولا حبت حتى تكلم فيه زوجها
لأنها واثقه فيه ودوم قدام عينها ولاحبت تسوي شوشرة وسببها هالادميه لان اختي سبق وتجرعت منها
في يوم من الايام قال لها جيبي ولدنا وامشي نطلع شوي نغير جو اطلعت معاه وقال لها اول بننزل ولدنا بيت اهلك وبنطلع قالت اوكي وهم بالطريق رايحين على بيت ابوي
تذكرت انها نست الحفاضات قال مو مشكلة وقف عند سوبر ماركت واختي افتحت ثلاجة السيارة تبي ماي كانت عطشانه شوي وهي تفتح الثلاجه شافت شي يولع تحت اشربت الماي وتمت اتأمل وتتساءل ياترى شنو هذا !!
افتحت الدرج اللي تحت الثلاجة وشافت جوال عالسايلنت يرن يعني هو اللي كان يبرق
وشافت جنبه 3 جوالات
ردت عالجوال وهي ساكته واسمعت بنت ( الوه الوه شفيك رد !! )
انصدمت اختي وصكت التلفون بسرعه وعينها عالسوبر ماركت
افتحت المسجات وشافت ما لا يتقبله العقل ولا الاخلاق
كلام بذيء و قذر فيه توصف لاعضاء تناسليه ووصف اوقات حميمة يعني الخلاصة اللي فهمتها اختي انها (( نامت معاه )) والمسجات كلها شوق له اتمنى فهمتوا ،،، افتحت الجوال الثاني اختي وحصلت بعد مسجات من رقم اخر يعني الظاهر حق كل صديقة حميمة حاط لها جوال و مخصص لكل وحدة خصوصية
نفس حال مرته واكيد كلهم مو حاسين طبعا مشالله عليه يعني ماخذ 4 وحدة بالحلال و3 بالحرام
المهم رجعت اختي كل الجوالات مكانها وصكت الثلاجة وانتظرته و رجع السيارة وجاب الاغراض
قالت له (( ارجع البيت )) والعبرة خانقتها والدنيا تلف من حولها لف مو طبيعي
قال ليش ؟ قالت بس ارجع ماكو شي بس حاسه بتعب
قال شفيج؟؟؟؟؟؟؟؟؟؟؟؟؟؟ قالت ولاشي بس ارجع جد جد راسي يدور ابي ارتاح
وهي طبعا تراعي اي تصرف قدام الخادمة بالسيارة
المهم ارجعوا البيت وادخلوا غرفهم وكل شي بدلت ملابسها وكل شي عاااااااااااادي
وجاء هو وقال لها شفيج حبيبتي غريبة كنتي عادية وفجأة تبين ترجعين تعب شنو عاد قولي ؟
راسج بطنج وهو يتكلم هي تطالعه بنظرات متأملة فيه وهو يتكلم غير نظرات كل يوم
قالت له ،، ابد لكن خاطري اسألك سؤال تشك فيني ؟
اني ممكن اخونك ؟ قال لها افا عليج شهالسؤال هذا ما ارضاه تسألينه عن نفسج
قالت ولو تفكر متى بتفكر انك تطالع غيري
قال ما اطالع غيرج ابد انتي من مالي عيني وقلبي وبس ولا حد غيرج
وانا اغض بصري ولا احب حتى بالنظر اطالع غيرج
قالت اممم انا بعد عمري ماتوقعتك تخونني
بق عينه وقالها انا خنتج ومسكها من ذراعينها وقالها اشفيج
قالت اللي باخلاقي و ديني وجمالي وطهارتي يفكر يكلم زباله عليها ؟؟؟
هنا هو مااااااااااااااااااااااااااات وعيونه احمرت وجاته رجفه شوي
قال شقاعده تقولين انتي ؟ من قاص عليج
قالت قالولي كلام قبل وماصدقته
قالولي حكي عنك شافوك ومعاك فلانه وفلانه وفلانه ومااااصدقت
وقلت مستحيل حبيبي و عمري يسويها لانه اطهر من الطهاره نفسها
دوم بعيني انت الصح وانت العدل وانت شيخ الرجال كلهم لكن من بعد هاللحظة ماسمعت من احد
ولا وصل لي كلام هالمرة شفت بعيوني وسمعت بأذني وبكت وهي تتكلم واااااايد
خذاها وضمها
و دزته و اكفخته كف على وجهه بكل قوتها
صرخ عليها بقول هيه انتي شسالفتج قالت انت عارف شسالفه
وانا مالي قعده عندك من بعد اليوم ما اتشرف اكون مع متناقض مثلك
واسلمه جسمي الطاهر
وهي تمشي تم يسحب فيها ويناديها قال والله تقولين شفيج قالت ابد بس روح رد عالجوال يرن بموترك
تبيك مسكينه تنادي عليك بأسم ( قذر ) روح لها هذا قدرك ؟؟
مات هنا والله مثل ماقولكم نزل لها وتم يحب رجولها يوقل لها بس سمعيني تكفين
قالت له قوم عني ما ابي اسمع اي كلمه وراحت بيت ابوي
وتم يلاحقها ملاحق بالسياره لين ما انزلت ويقولها تكفين حبيبتي سمعي مني هذول زباله حشرات قذاره والله مايسوون ظفر رجلج وهي صم بكم عمي
وهو يتكلم ويتكلم وهي ولااااااااااااا تسمعه
دخلت البيت وكل شي واستغربنا كلنا اشفيج يافلانه شصاير
وهي سااااااااااااكته خليناها براحتها لان فهمناها خلاف خصوصا بالاغراض اللي معاها
ونامت ثاني يوم قالت السالفه لنا ولاخواني وحلفتنا ما نطلع شي برا
واخوي الكبير تصرف وقالها ماتردين على اتصالاته خيرشر قالت له ههههههههه خذ السيم ما ابيه شالت السيم كارد من جوالها واكسرته
وثاني يوم بدلت رقمها واحلفت ما يشوف رقعة وجهها واذا يبي ولده يتفضل ويشوفه
اول يومين ماشفناه لكن عقب والله العظيم
انه تم يجي لاخواني وابوي وعمامي بالديوانية يترجاهم رجا انه يبي يرجعها البيت وانه يبيها وانه الشيطان و و و و
قال له اخوي اللي مثلك ينخاف منه واحد ما سمعنا عنه اي شي ولا البنت ماحست بأي شي معاك وتجي فجأه وتنصدم بفايلك من تحت الطاولة
اللي مثلك مو واضح ومنافق و متناقض
وتفاهموا معاه اخواني يمكن شهر كامل وهم في تفاهم معاه والمشكله ان اخواني يحبونه ويعزونه لانهم فعلا ماشافوا منه الا كل خير ووقفات ومساعدات وواسطات
جا اخوي لاختي وقال لها شوفي ترى الرجال شاريج وحلف انه ماعاد يرتكب اي شي من هالتصرفات
وقال اطيح من عيون الكل الا من عيونج انتي بالذات اسعى اني اتم فيها عن كل البشر
هذي كلمته اللي نقلها اخوي وقال لاخوي قول لها وكلمها ترجع تكفى
وتمت اختي تدخل في شهر وشهر ولا تعطينها كلمه
لين صكت 11 شهر والله ياجماعه يعني قريب السنه وهو رايح رااد عالديوانيه يكلم ارجالها وكل بين شهر دز حد من خواته وامه وعمته
ويحاول فيهم وهي مسدده كل التواصل لا موبايل لا شوفه ولاشي لانها بالعامي عطته اكس
لين ماجاها ابوي اللي كان هو الوحيد معاها ويقولها بيتي لج مفتوح بكل حاله وانتي بنت وانتي متزوجه وانتي مطلقه وانتي زعلانه لا تحسسين
ولا تردين لزوجج مجبورة اشتري راحتج و نفسيتج وامانج وصحتج
عمرنا ماحسسناها بشي لان هذي الحقيقه احنا انتمنى الدقيقة اللي تزورنا فيها
جاها وكلمها بعد 11 شهر قال لها يا بنتي رجلج رجال والنعم فيه واذا اخطى ما جتمع اثنين الا وثالثهم الشيطان
سواء برغبته او رغبة اللي معاه الدنيا ماشيه واخذي و خلي ما دامه وصل لهالحد
قالت ليش هو شقالك ؟
قال لها يا بنتي جاني اليوم و باس رجولي بقاعها عشان يردج وانا يا بنتي مراجلي ما تخليني اصده من عقب هالتصرف
خاصة انه وعدني وحلف لي انه ماراح يكررها وانه ناااادم حيل و انه يبيج في بيته انتي الداخلة وهو الطالع
وانج انتي ام ولده ولا يبي غيرج زوجه له
يا بنتي ارجعي له وشوفيه الانسان بساعه يتغير وربج مسامح وانتي ما تسامحين
قالت اختي خير انشالله
وصكت سنة كااااااااااااملة وقالت اختي لاخوي وابوي اوكي انا موافقه بس بشروط ان قبلها اوكي
قالت ما يسافر الا بي ،، وقالوله قال والله ما اسافر ولا ابي اطب اي بلد الا بها هي
المهم وبعد السنة ارجعت له فترة قوية بصراحه على موقف قوي مثل هالموقف !
ومشالله عليها فعلا اصبرت
وارجعت له وسافر معاها العمرة ومن ثم الحج
ووعدها قال لها والله العظيم ان سمعتي بس سمع عني شي مب زين حتي اشنبي
والله اغدي لج رجال مثل ما عهدتيني وازود
وطبعا وبصراحه هي مازالت مجروحه وما نست هالموقف
والحين جابت منه بنتين و كملوا حياتهم
تسافر معاه وتجي
وقال لها انهيت كل علاقاتي بالحشرات
وقال لها والله مافي سبب خلاني اخونج انتي مو مقصرة معاي وكفو لكن اصحاب السوء والتقليد ما ادري اشلون ولا اعرف اوصف لج شلون تجرأت وقلت اجرب لكن تقصير منج او نقص حشا والله تعداج العيب
والحمدلله الحين هم من بعد هالسالفه 4 سنوات قضوها
وانشالله مايصير بينهم الا كل خير
لكن انا خذت عبر بهالسالفه والله وفادتني بحياتي
1\ ان الوحده اذا حسست زوجها بالعزوه وقدرت وحشمت اخوانها راح تلقاهم بكل وقت ووقت حاجتها بالذت
2/ الكرامه اذا حشمت الوحده كرامتها وشرتها يحس الطرف الثاني بخطأه اكثر وشخصية الانسانه ذي
3/التسامح مافي مانع نتسامح ونصحح الغلط لكن بعد فترة طويله حلو اني اصبر واشوف مدى حب هالانسان لعلاقة الزواج ومدى مشتراه لج
واسفه عالاطاله
منقوووووووووووووول
موضوع: قصة خيانة زوج اختي النزيه والكفو بعين الكل ، يمكن تشوفين لج عبره من هالقصة- كويتيات 
